Video: Bir yoshli bolakay bolalar bog‘chasidan qochib chiqib ketdi

«Vologda.rf» portali YouTube’da videokuzatuv kamerasidan olingan yozuvni e'lon qildi, unda bir yoshli bolaning xususiy bolalar bog‘chasidan mustaqil ravishda chiqib ketishi va ko‘chada 10 daqiqa aylanib yurishi tasvirlangan.

Saytning yozishicha, bu 12 iyul kuni Vologdada sodir bo‘lgan, ammo video endi paydo bo‘ldi. Bolaning onasi Svetlana Gudkova so‘zlariga ko‘ra, bolakay kuzatuvsiz qolgan, natijada u, rolikda ko‘ringanidek, bitta pampersda orqa eshikdan ko‘chaga chiqqan va qochib ketgan.

Onaga ko‘ra, ko‘chada bolakayga ayollardan biri e'tibor qaratgan. «U avvaliga boshqa bolalar bog‘chasiga olib kelgan. Aftidan, uning tarbiyachilari qo‘shni muassasaga qo‘ng‘iroq qilishgan. Bunga qadar u yerda bolani hech kim qidirmagan ham», - deya xabar berdi Gudkova. Bolani topib olgan ayol politsiyaga ham murojaat qildi, shuning uchun oila bu hodisadan xabar topdi.

Hodisadan keyin Gudkovlar boshqaruv kompaniyasi orqali videokuzatuv kameralaridan yozuvlarni olishdi. Materiallar prokuratura va Tergov komissiyasiga yuborildi, tekshiruv o‘tkazilmoqda. Bundan tashqari, oila bir nechta nazorat organlariga murojaat qildi.

Bolalar bog‘chasidan ma'lum qilishlaricha, tarbiyachilar ishini nazorat qilish choralari kuchaytirilgan. Xabar qilinishicha, hodisaga aloqador pedagog ishdan bo‘shatildi.