Mirjalol Qosimov: «Bunyodkor» saqlab qolinishi kerak»

«Bunyodkor» bosh murabbiyi Mirjalol Qosimov Superliga 21-turidan o‘rin olgan «Nasaf»ga (4:1) qarshi safar o‘yinidagi yirik g‘alabadan so‘ng, o‘z fikrlarini bildirib o‘tdi.

«Qarshida «Nasaf»ga qarshi doimo qiziqarli o‘yin bo‘ladi. Bugun ham ko‘plab vaziyatlar bo‘ldi, gollar urildi. Bugun bizga omad kulib boqdi. Agar penaltini darvozabonimiz qaytara olmaganida, o‘yin boshqacha natija bilan yakunlanishi mumkin edi.

Maqsadimiz - chiroyli o‘yin ko‘rsatib, muxlislarni xursand etish. Ochkoni kuzda sanaymiz, g‘oliblikka kuchimiz yetadi va yigitlarim bunga haqli.

«Nasaf» ham yomon o‘yin ko‘rsatmadi. Lekin omad ko‘proq biz tarafda bo‘ldi. Menimcha, murabbiy hech qachon jamoadan 100 % qoniqish hosil qilmaydi. Chunki, o‘yin davomida baribir qandaydir xatolar uchrab turadi.

«Bunyodkor» saqlab qolinishi kerak. O‘zbek futboli uchun yaxshi futbolchilar yetishtirib bermoqda. Qolaversa, klub akademiyasida mingga yaqin bolakaylar futbol sir-asrorlarini o‘rganishmoqda. Umid qilamanki, klubning umri uzoq bo‘ladi», - deb Qosimov so‘zlarini keltirmoqda Sports.uz.