Fransiya O‘zbekistonga kosmik sohani rivojlantirishga yordam beradi

Oliy Majlis Senat raisi birinchi o‘rinbosari Sodiq Safoyev boshchiligidagi O‘zbekiston delegatsiyasi Fransiyaga tashrifi davomida Thales Alenia Space kompaniyasi vitse-prezidenti E.Imbert bilan uchrashdi. Muzokaralar davomida O‘zbekistonda kosmik sohasini rivojlantirishda o‘zaro manfaatli hamkorlik masalalari muhokama etildi. 

O‘zbekiston delegatsiyasi vakillari Thales Alenia Space kompaniyasining kosmik sun'iy yo‘ldoshlarini yig‘ish bo‘yicha ishlab chiqarish obektlarida bo‘lishdi. 

Fransiya kompaniyasi mahalliy kosmik ilm-fanini rivojlantirish shart-sharoitlarini yaratish va mamlakatni innovatsion rivojlantirishda uning yutuqlaridan keng foydalanish hamda bu sohadagi xalqaro hamkorlikni kengaytirishga doir amalga oshirilayotgan chora-tadbirlarni yuqori baholadi. 

Tomonlar kompleks kosmik tizimlarga oid loyihalarni birgalikda amalga oshirish, shu jumladan O‘zbekiston hududida mahalliy mutaxassislarni o‘qitish uchun texnologik baza faoliyatini tashkil qilishdan manfaatdor ekanliklarini bildirishdi.

Thales Group – Fransiyaning aeronavtika, kosmos, mudofaa, sun'iy yo‘ldosh texnologiyalari va havo harakatini boshqarish sektorlaridagi yetakchi xalqaro sanoat kompaniyalaridan biri. Dunyoning 56 mamlakatida kompaniya faoliyati yo‘lga qo‘yilgan. Xodimlarning umumiy soni - 64 ming kishidan ziyod. O‘rtacha yillik aylanma 16 milliard yevroga yaqin. Thales Group O‘zbekistonda o‘z vakolatxonasiga ega.