Osiyo o‘yinlari. O‘zbekiston kurashda navbatdagi oltinni qo‘lga kiritdi

O‘zbekiston Osiyo o‘yinlarida o‘zbek milliy kurashi yana bir oltin medalni qo‘lga kiritdi.

-63kg vazn toifasida O‘zbekiston sharafini himoya qilgan  Dildor Shermetova avvaliga yarim finalda indoneziyalik Shifa Hasaniy Najmu bilan bellashib, g‘alabaga erishdi.

Shundan so‘ng u oltin medal uchun finalda gilamga chiqdi. Shermetova mo‘g‘ulistonlik Bayarbat Basanjargalga qarshi murosasiz kechgan bahsda g‘alaba qozonib, Osiyo o‘yinlarining oltin medaliga sazovor bo‘ldi.

Shu vazn toifasidagi Muxlisa Abdumalikova yarim finalda mo‘g‘ulistonlik Bayarbat Basanjargalga qarshi gilamga chiqib, yutqazib qo‘ydi. U endi turnirning bronza medali bilan taqdirlanadi.

-81 kg vazn toifasidagi Sarvar Shomurodov yarim finalda eronlik Ilyos Ali Akbariga qarshi gilamga chiqdi. Ammo Shomurodov kuchli raqibga qarshi bahsda yutqazib qo‘ydi va bronza medal bilan kifoyalanadigan bo‘ldi.

Eslatib o‘tamiz, 28 avgust kuni O‘zbekiston kurash jamoasi 3 vazn toifasida oltin medalga egalik qilgandi.

O‘zbekiston delegatsiyasi hisobidagi oltin medallar soni endilikda 11tani tashkil qilmoqda. Shuningdek, 15 kumush va 16ta bronza qo‘lga kiritilgan.