Amerikalik ayol velosiped tezligini soatiga deyarli 300 kilometrga yetkazib jahon rekordini o‘rnatdi

Amerikalik Denis Myuller-Korenek velosiped tezligini soatiga 295,6 kilometrga yetkazib jahon rekordini o‘rnatdi. Rekord AQShning Yuta shtatidagi qurib qolgan Bonnevill sho‘r ko‘li sathida o‘tkazildi. Uning tekis tuzli yuzasi ishqalanishni kamaytiradi, shu bois bu yerda maksimal tezlik o‘rnatish uchun turli sinovlar o‘tkaziladi.

45 yoshli Myuller-Korenekning velosipedi maxsus sport avtomobiliga mahkamlandi va avtomobil velosiped tezligini soatiga 241 kilometrga yetkazdi. Shundan so‘ng velosipedni tortib turgan troslar yechib yuborildi va Myuller-Korenek besh kilometr masofani o‘zi bosib o‘tdi.

Velosiped yengil uglerod materiallardan tayyorlangan bo‘lib, maxsus tishli g‘ildiraklar o‘rnatilgandi – ular katta tezlikda ham muvozanatni saqlash hamda pedal bir marta tepilganida 40 metrgacha yurish imkonini berardi.

Avvalgi jahon rekordi gollandiyalik Fred Rompelbergga tegishli: u 1995 yilda tezlikni soatiga 268,7 kilometrga yetkazgan. Ayollar o‘rtasidagi rekord esa Myuller-Korenekka tegishli: u 2016 yilda velosiped tezligini soatiga 237,7 kilometrga yetkazgan.