O‘zbekiston oltin-valyuta zaxiralari keskin kamaydi

Markaziy bank O‘zbekiston Respublikasining oltin-valyuta zaxiralari to‘g‘risidagi ma'lumotni e'lon qildi.

Oltin-valyuta zaxiralarini hisoblash metodikasi Xalqaro valyuta jamg‘armasining standartlari asosida yuritiladi. 

Oltin-valyuta zaxiralarining tarkibi xorijiy valyuta aktivlari va quyma shaklidagi monetar oltindan iborat.

Oltin-valyuta zaxiralarini samarali boshqarish maqsadida Markaziy bank tomonidan zaxiralarning yalpi va sof qiymatlari hisobi yuritiladi.

Yalpi oltin-valyuta zaxiralari 26,8 mlrd dollarni tashkil etdi (avgustda 27,3 mlrd dollar edi). Ulardan xorijiy valyutadagi aktivlar - 12,9 mlrd dollar (bir oy avval 13,5 mlrd dollar bo‘lgan), monetar oltin - 13,9 mlrd dollar (avgustda 13,7 mlrd dollar bo‘lgan).

Sof oltin-valyuta zaxiralari 25,9 mlrd dollarni tashkil etdi (bir oy avval 26,3 mlrd dollar bo‘lgan).

Markaziy bank izohiga ko‘ra, joriy yilning yanvar-avgust oylarida oltin-valyuta zaxiralarining pasayishi oltin narxining 1296,50 dan 1206,85 doll/tr.untsiyaga pasayishi hisobiga yuzaga keldi (narxning oltin-valyuta zaxiralarining kamayishga ta'siri - 970,4 mln dollar).

Joriy yilning avgust oyida oltin-valyuta zaxiralarining pasayishi oltin narxining 1219,20 dan 1206,85 doll/tr.untsiyaga pasayishi hisobiga yuzaga keldi (narxning oltin-valyuta zaxiralarining kamayishga ta'siri - 139,7 mln dollar).

Eslatib o‘tamiz, avvalroq Shveytsariya O‘zbekistonning asosiy eksport bozori bo‘lib qolgani, u yerga oltin sotilayotgani xabar berilgandi.