Yangi Zelandiyadagi supermarketlar tarmog‘ida sotilgan qulupnaylardan igna topildi

Foto : State of Queensland

Yangi Zelandiyaning Oklend shahridagi Countdown tarmog‘i do‘konida Avstraliyadan keltirilgan qulupnaylar partiyasida ignalar borligi aniqlandi. Choice brendi ostidagi qulupnay uch tarmoq — Countdown, SuperValue va FreshChoice'dan qaytarildi.

Supermarket mijozlarni iste'mol oldidan qulupnaylarning ichini ochib ko‘rish zarurati haqida ogohlantirdi hamda ularga mevalarni qaytarish imkonini berdi.

"Xaridorlar xotirjamlik uchun uylaridagi Choice brendi ostidagi qulupnaylarni qaytarishlari mumkin. Ularga kompensatsiya beriladi", deb yozilgan Countdown tarmog‘ida.

Countdown tarmog‘i shuningdek voqeani o‘rganish maqsadida Yangi Zelandiya va Avstraliya hukumatlari bilan bog‘landi. Tarmoq vakili ignali qulupnaylar aniqlangan do‘konlar manziliga aniqlik kiritmadi. Shu bilan birga, ignalarni xaridor aniqlaganmi yoki do‘kon xodimi - noaniq.