MRB 4 ta davlat haqida katta ko‘lamli ma'lumot to‘plashi ma'lum qilindi    

Markaziy razvedka boshqarmasi (MRB) direktori Jina Xaspel boshqarmaning Rossiya, Xitoy, Eron va Shimoliy Koreya haqida katta ko‘lamli ma'lumot to‘plash rejalari haqida ma'lum qildi. U bu haqda 24 sentabrda Luisvill universitetida ilk omma oldidagi nutqida aytib o‘tdi.   

Xaspel “eng murakkab masalalar bo‘yicha ma'lumot to‘planishi ko‘proq moliyalashtirilishiga” va'da bergan.

NBC telekanalining ta'kidlashicha, “murakkab masalalar” iborasi bu 4 ta davlatga qarshi qaratilgan razvedka faoliyati uchun shartli ibora hisoblanadi.  

“Bu murakkab davlatlarga nisbatan razvedka ma'lumotlari yig‘ishdagi bo‘shliqlarni to‘ldirishga qaratilgan sa'y-harakatlarimiz oxirgi yillar davomida terrorchilikka qarshi kurash sababli ikkinchi planga o‘tib qolgandi”, deb qo‘shimcha qilgan Xaspel.

Xaspel MRB direktori lavozimiga may oyida tayinlangan. U boshqarmaga rahbar bo‘lgan ilk ayol hisoblanadi. Bungacha Xaspel MRB direktorining maxfiy operatsiyalar bo‘yicha o‘rinbosari bo‘lib ishlagan.