MAK monopoliyasi har yili ichki aviatashuvlar bozorining 1,9 foiz qisqarishiga olib kelmoqda

O‘zbekiston transport tizimi yo‘lovchilarni turli transport vositalarida muvofiqlashtirilgan holda tashish siyosatiga ega emas, bu sayyohlar uchun mamlakat jozibadorligini pasaytirmoqda, deyiladi 2025 yilgacha bo‘lgan davrda turizmni rivojlantirish konsepsiyasida.

Xususan, O‘zbekistondagi fuqarolik aviatsiya tashuvlari sektori bog‘lamalarning yetarli emasligi, shuningdek, xizmatlarning yuqori qiymati bilan ajralib turadi. Bu Turizmni rivojlantirish davlat qo‘mitasiga ko‘ra, ko‘p jihatdan «O‘zbekiston havo yo‘llari» MAKning monopolistik pozitsiyalari bilan bog‘liq.

Natijada, O‘zbekiston mintaqada xalqaro aviatashuvlar o‘sish sur'atining eng past ko‘rsatkichiga (2%), shuningdek, ichki aviatashuvlar bozorining qisqarishiga (har yili 1,9% ga) ega bo‘ldi.

«Shu kabi holat «O‘zbekiston temir yo‘llari» AJ temiryo‘l tashuvlari tizimida ham kuzatilmoqda, u temiryo‘l sostavlari va reyslarning yetishmasligi bilan ajralib turadi», - deya ta'kidlanadi hujjatda.

Shuningdek, respublikada hududlararo, belgilangan jadval asosida muntazam ravishda harakatlanuvchi avtobus transporti yo‘nalishlari deyarli yo‘lga qo‘yilmagan.

Bundan tashqari, mintaqalararo yo‘nalishlar noqulay va murakkab transport logistikasiga ega. Masalan, mintaqalar o‘rtasida aviaqatnovlar yo‘q, barcha qatnovlar Toshkent orqali amalga oshiriladi, bu transport xarajatlarining ko‘payishi hamda respublika mintaqalari o‘rtasida sayohat qilishning kamayib ketishiga olib kelyapti.

Eslatib o‘tamiz, avvalroq «O‘zbekiston havo yo‘llari»ni bir nechta kompaniyalarga bo‘lib yuborish taklif etilgandi.