Bikmayev «Paxtakor»ga qarshi o‘yindagi harakati uchun jazoga tortilishi mumkin

«Lokomotiv» hujumchisi Marat Bikmayev kecha «Paxtakor»ga qarshi kechgan o‘yindagi nojoiz harakati uchun PFL tomonidan jazolanishi mumkin.

«O‘yinchi butun o‘zbek futboli jamoatchiligi diqqat-markazida turgan uchrashuv vaqtida qo‘li bilan xunuk harakat ko‘rsatdi va bu holat o‘yinni tomosha qilayotgan ko‘psonli ishqibozlar tomonidan salbiy qabul qilindi. Mazkur xunuk xatti-harakat raqib jamoa muxlislari tomon qaratilgan bo‘lishi ham mumkin.

Professional futbol ligasi Marat Bikmayev tomonidan amalga oshirilgan ushbu harakatni inobatga olib qo‘ydi. Tez orada Tartib-intizom qo‘mitasi ushbu holatni atroflicha o‘rganib chiqadi», - deyiladi PFL xabarida.

«Lokomotiv» hozircha ushbu holatga munosabat bildirganicha yo‘q. Yuqori tashkilotdan oldin klubning o‘zi futbolchini tartibga chaqirgani yoki intizomiy chora ko‘rgani noma'lum bo‘lib turibdi.

Bu - Bikmayevning o‘yindagi yagona odobsizligi emas. U 70-daqiqadagi golini nishonlashi bilan ham badxulqlik namunasini ko‘rsatgan edi. O‘zbekiston terma jamoasi asosiy hujumchisining ushbu harakatlariga nisbatan jiddiy jazo qo‘llanmasa, bu keyinchalik boshqa futbolchilarga ham salbiy turtki bo‘lishini taxmin qilish mumkin.

Hujumchi Instagram`dagi sahifasi orqali ikkinchi golini bu tarzda nishonlagani uchun uzr so‘radi.

«O‘zbek futbolining hurmatli muxlislari va «Paxtakor» ishqibozlari! «Paxtakor» darvozasiga urgan golimni bunday nishonlaganim uchun uzr so‘rashni istayapman. Bu anglashilmovchilik bo‘lgan edi. Men hech kimni xafa qilishni istamagandim, hech kimni haqorat qilishni xohlamagandim, ishoning. Futbolda hamma narsa bo‘ladi. Hissiyotlar jo‘sh urayotgan, qizg‘inlik eng yuqori nuqtasiga yetgan, adrenalinni ushlab qolish ilojsiz edi. Shunchaki o‘zimni ushlab qola olmadim. Es-hushim joyida va hammasini tushunib turibman, bahonam yo‘q, qo‘shilaman!!! Mendan xafa bo‘lmasliklari uchun yana bir marta kechirim so‘rashni istayman.

P.S. Men haqimda boshqa ig‘vo qilmasliklariga umid qilaman», - deb yozdi Bikmayev.

Qayd etish kerak, hujumchi faqat golni nishonlash tarzi uchun uzr so‘ragan bo‘lib, PFL e'tiroziga sabab bo‘lgan va ko‘rib chiqilishi va'da qilingan qo‘l ishorasi haqida og‘iz ochmagan.

Eslatib o‘tamiz, «Paxtakor»ni 3:2 hisobida mag‘lub etgan «temiryo‘lchilar» qatorasiga uchinchi marotaba O‘zbekiston chempioni bo‘lishga erishgan, Marat Bikmayev jamoasining so‘nggi ikkita goliga mualliflik qilgan edi.