Hindiston va Pokiston Kashmirda bir-birini o‘qqa tutdi

Foto: Mukesh Gupta/Reuters

Hindiston Mudofaa vazirligi vakili podpolkovnik Devender Anandning ma'lum qilishicha, Hindiston va Pokiston harbiylari Kashmirda yana bir-biriga qarata o‘t ochgan. Bu haqda RIA «Novosti» xabar bermoqda.

Uning aytishicha, Pokiston armiyasi kecha tunda o‘t ochdi.

«Pokiston armiyasi hech qanday sababsiz o‘t ochmaslik to‘g‘risidagi rejimni buzib, Aknur sektorini o‘qqa tutdi», - deya ta'kidlab o‘tgan Anand.

Shuningdek, uning qo‘shimcha qilishicha, hindistonlik harbiylar ham bunga javoban o‘t ochishgan.

«Soat taxminan 06:30 (Toshkent vaqti bilan soat 06:00)da otishma to‘xtadi», - deya qayd etib o‘tdi Anand.

Anand ikki mamlakat harbiylari o‘rtasidagi otishma oqibatida halok bo‘lganlar to‘g‘risidagi ma'lumotga aniqlik kiritmadi.

Eslatib o‘tamiz, avvalroq Hindiston Pokiston bilan ziddiyatga vositachilar jalb etilishiga qarshi chiqqandi.

#Hindiston #Pokiston

14 fevral kuni Pokiston hududida o‘rnashgan «Jaysh-e-Muhammad» terrorchi guruhi Kashmirda Hindiston armiyasi harbiylari kolonnasi o‘tayotgan yo‘lda terakt sodir etishi natijasida 46 nafar hind harbiysi halok bo‘ldi. Bu voqea ortidan Pokiston va Hindiston munosabatlarida mojaro yana avj oldi.