Rossiya TIV: Sheremetevo aeroportida AQSh elchixonasi xodimi mina olib o‘tishga urindi

Moskvaning Sheremetevo aeroportida AQSh elchixonasi xodimi yuklari ichida mina olib o‘tishga urindi, deb xabar berdi RIA Novosti Rossiya TIV matbuot xizmatiga tayanib.

"Aftidan, AQSh chegaralarimiz yaqinida muntazam ravishda jangovar kemalar va samolyotlar yordamida ig‘vogarona reydlar uyushtirish orqali Rossiyada xavfsizlik ta'minlanganlik darajasini nafaqat tashqaridan, balki ichkaridan ham tekshirishga urinmoqda. Buning ustiga, o‘z elchixonasi xodimlari yordamida", — deb ma'lum qilgan RIA Novostiga TIV vakili.

Tashqi ishlar vazirligining bildirishicha, AQSh elchixonasi xodimining yuklari tekshirilganida minomyot minasiga o‘xshash buyum borligi aniqlangan.

Qayd etilishicha, tekshiruv joyiga chaqirilgan portlash texnikasi mutaxassislari uning korpusi ustida portlovchi modda izlari bo‘lgan, ammo portlovchi moddasiz mina ekanligini tasdiqlashgan.

Diplomatlarning so‘zlariga ko‘ra, elchixona xodimi xizmat safari yakunlangani tufayli Rossiyani tark etayotgan bo‘lgan va bo‘sh minani "shaxsiy kolleksiyasi uchun" olganini ta'kidlagan. U keyingi reys bilan Nyu-Yorkka uchib ketgan, faqat minasiz holda.