Navoiyda firibgarlik orqali 2500 dollar pulni o‘zlashtirgan ayolga hukm o‘qildi

Jinoyat ishlari bo‘yicha Navoiy shahar sudining ochiq sud majlisida 4 nafar farzandning onasi bo‘la turib, hech bir foydali mehnat bilan shug‘ullanmasdan firibgarlik jinoyatini sodir qilgan ayolning jinoyat ishi ko‘rib chiqildi.

Sudda aniqlanishicha, G. Salimova (ism-familiyalar o‘zgartirilgan) 2018 yilning 6 yanvar kuni O.Umarovaga Rossiya Federatsiyasidan tanishlari orqali non mahsulotlarini ishlab chiqarish uskunalarini olib keltirib berishni va'da qilgan va 2018 yilning may oyiga qadar 2500 dollar pulni firibgarlik yo‘li bilan qo‘lga kiritib, bu pullarni shaxsiy ehtiyojlariga ishlatgan.

Sud G. Salimovaga jazo tayinlashda uning aybiga to‘liq iqrorligi va qilmishidan chin ko‘ngildan pushaymonda bo‘lib, shaxsini va oilaviy sharoitini, ayolligini, sodir etgan jinoyatining ijtimoiy xavflilik darajasini, jabrlanuvchiga yetkazilgan zarar to‘liq qoplanganligini inobatga olib, O‘zbekiston Jinoyat Kodeksining 168-moddasi 3-qismi “b” bandida nazarda tutilgan jinoyatni sodir qilganlikda aybli deb topib, JKning 60-moddasi tartibida 2 yil axloq tuzatish ishlari jazosi tayinladi.

Shuhrat Kamolov,
jinoyat ishlari bo‘yicha
Navoiy viloyat sudi raisi o‘rinbosari.