Qudratli texnikalar bellashuvi yakunlandi. G‘oliblar nomi ma'lum

5 may kuni «Chirchiq» poligonida «Xotira va Qadrlash kuni»ga bag‘ishlangan va Mudofaa vazirligi miqyosida 5 kundan buyon o‘tkazib kelinayotgan Tank biatloni musobaqasining final bosqichi yakuniga yetdi.

Unda O‘zbekiston mudofaa vaziri general-mayor Bahodir Qurbonov, Toshkent viloyati hokimi o‘rinbosari, davlat va jamoat tashkilotlari hamda faxriylar kengashi vakillari va minglab yurtdoshlarimiz ishtirok etdi. Tantanali marosimda so‘zga chiqqan mudofaa vaziri mazkur bellashuv harbiy xizmatchilar o‘rtasida musobaqadoshlik, o‘zaro jipslik va hamjihatlik muhitini shakllantirish, ularning kasbiy malaka va mahoratini yuksaltirishga xizmat qilishini aytib o‘tdi. Shuningdek, yig‘ilganlarni yaqinlashib kelayotgan «Xotira va qadrlash kuni» munosabati bilan muborakbod etib, Tank biatloni musobaqasi ishtirokchilariga shiddatli bahslarda omad tiladi.

Shundan so‘ng 1,5 mingdan ortiq harbiy xizmatchilar, 100ga yaqin Ikkinchi jahon urushi yillaridagi va bugungi qurollanishda turgan zamonaviy harbiy texnika va 15dan ziyod vertolyot ishtirokida bayramga bag‘ishlab parad o‘tkazildi.

Parad davomida desantchilar qariyb 2000 metr balandlikdan parashyut yordamida sakrashdi. E'tiborli jihati, mazkur tadbirda harbiy xizmatchilarimiz birinchi bor «Malva aksioma» parashyutidan foydalangan holda sakrashni amalga oshirdi. Harbiy xizmatchilarning ko‘rgazmali chiqishlarini 5 mingdan ziyod kishi kuzatib bordi. Ishtirokchilarning maroqli dam olishi uchun poligonda bayram sayli ham tashkil etildi.

Harbiy parad yakunlangach, tank biatloni musobaqasining so‘nggi bellashuvi boshlandi. T-62, T-64 va T-72 tanklari «Qudratli texnikalar jangi»ni o‘tkazishga mo‘ljallangan va xalqaro standartlarga mos bo‘lgan maxsus maydondan start oldi. Musobaqa ishtirokchilari sun'iy hovuz, minalashtirilgan va manyovr bajarish maydoni, tankka qarshi chuqur, qo‘rg‘on, eskarp (tankka qarshi devor), kolleyali ko‘prik maketi va boshqa to‘siqlardan iborat umumiy uzunligi 4200 metr bo‘lgan masofani bosib o‘tdi.

Otish mashqlarini bajarishda pushkalar uchun tezligi 1000 m/s dan kam bo‘lmagan o‘q-dorilardan foydalanildi. Musobaqa «Yakka tartibdagi (individual) poyga» tabiiy va sun'iy to‘siqlari mavjud bo‘lgan, jangovar yo‘lakcha va otish uchun okoplar (maydoncha) bilan jihozlangan yo‘nalish bo‘yicha o‘tkazildi.

Musobaqa yuksak saviyada o‘tkazilishi va g‘oliblarni odilona baholash maqsadida biatlonni malakali mutaxassislardan iborat hakamlar jamoasi kuzatib bordi. Nishonlarni urolmagan, belgilangan to‘siqlarni bosib o‘tishda xatolikka yo‘l qo‘ygan jamoalarga jarima aylanishlari va jarima vaqtlari belgilandi. Yakuniy hisob-kitoblarga ko‘ra, quyidagi jamolar g‘oliblar qatoridan o‘rin oldi.

T-62 tank ekipajlari orasida:

·       1-o‘rin — Janubi-g‘arbiy maxsus harbiy okrug;

·       2-o‘rin — Janubi-g‘arbiy maxsus harbiy okrug;

·       3-o‘rin — Shimoli-g‘arbiy harbiy okrug.

T-64 (takomillashtirilgan) tank ekipajlari orasida:

·       1-o‘rin — Sharqiy-harbiy okrug ekipaji;

·       2-o‘rin — Chirchiq oliy tank qo‘mondonlik-muhandislik bilim yurti;

·       3-o‘rin — Sharqiy-harbiy okrug.

T-72 tank ekipajlari orasida:

·       1-o‘rin — Toshkent harbiy okrugi ekipaji;

·       2-o‘rin — Janubi-g‘arbiy maxsus harbiy okrug;

·       3-o‘rin — Markaziy harbiy okrug.

G‘olib va sovrindor jamoalar mudofaa vaziri tomonidan diplom va qimmatbaho sovg‘alar, navbatdagi harbiy unvonlar hamda mamlakatimizda ishlab chiqarilgan budjet yengil avtotransport vositalariga imtiyozli ravishda kredit olish huquqini qo‘lga kiritishdi.

Eslatib o‘tamiz, O‘zbekiston Mudofaa vazirligi harbiy xizmatchilari birinchi marta 2019 yilda Xalqaro armiya o‘yinlari (ArMI-2019) doirasida o‘tkaziladigan eng nufuzli musobaqa – «Tank biatloni»da ishtirok etadi.