Krishtianu Ronaldu milliy jamoada o‘ynash baxti, yoshi va Millatlar ligasi finali haqida

Portugaliya milliy jamoasi hujumchisi Krishtianu Ronaldu Millatlar ligasining Niderlandiyaga qarshi kechadigan final o‘yini oldidan UYeFA rasmiy saytiga intervyu berdi.

– Milliy jamoaga qaytishingiz bilan darrov gol urdingiz. Taassurotlar qanday?
– Terma jamoada o‘ynash men uchun doim katta sharaf. Bu – mening milliy jamoam, uning formasini kiyish – ulkan faxr. Bunday musobaqada qatnashish o‘ziga xos tajriba, unda gol urish esa – nur ustiga a'lo nur.

– Yoshingiz o‘tib borayotganiga qaramay, hamon cho‘qqida turishni qanday uddalayapsiz?
– Hamma gap tayyorgarlikda – mening ishlash etikam shunaqa. 34 yosh bo‘lishimga qaramay o‘zimni a'lo his etyapman. Eng muhimi – sening o‘y-xayollaring. Asosiysi motivatsiya va baxtni his etish, yo‘ldan chalg‘imaslik. Hali futbolga yetarlicha foyda keltira olaman, deb o‘ylayman. O‘zimni juda yaxshi his etyapman!

– Tez orada Niderlandiyaga qarshi final bo‘lib o‘tadi. Raqib haqida nima deysiz?
– Niderlandiya milliy jamoasi rosa kuchli. Juda yaxshi o‘yin ko‘rsatishadi. Oxirgi o‘yinlarini ko‘rdim. Jamoada juda zo‘r o‘yinchilar – ham yosh, ham tajribali futbolchilar yig‘ilgan. Bu jihat ularning kuchini oshiradi.

– Yevro-2006 va Yevro-2016 musobaqalaridan keyin milliy jamoalar miqyosida ilk marta yirik turnir finalida o‘ynayapsiz. Bu musobaqaga qanday kayfiyatda keldingiz?
– Aytib o‘tganimdek, milliy jamoa libosini kiyishdan doim faxrlanganman. Klubdagi o‘yinlar bilan solishtirganda bu mutlaqo boshqacha hissiyot. Bu – bizning yurtimiz. Oilam Portugaliyadan, do‘stlarim ham. Portugaliyada o‘sib ulg‘ayganman, shunday ekan o‘z vataning sharafini himoya qilish – bu hisni taqqoslab bo‘lmaydi. Va, albatta, sovrinlar uchun kurashish milliy jamoadagi o‘yinlarga yana ham o‘zgacha kayfiyat beradi. Yevro-2004 va Yevro-2016 ham xuddi shunday kechgandi, hozir ham milliy jamoadagi ruhiyatim o‘shanday.

Bu – bizning uchinchi finalimiz. Unda ikkinchi sovrinimizni qo‘lga kirita olishimizga umid qilaman. Ajoyib natija bo‘lardi. Menda umid bor – jamoada ham. Kayfiyatimiz yuqori, o‘z uyimizda o‘ynaymiz. Muxlislarimiz qoyilmaqom muhitni yaratib, o‘zlaridagi ijobiy energiyani bizga ham ko‘chirishsa kerak. Hammamiz birgalikda chempion bo‘lish qo‘limizdan keladi.