Turkiya Rossiyadan S-400 majmualarining birinchi partiyasini oldi (video)

Turkiya mudofaa vazirligi Rossiyadan S-400 zenit-raketa majmualarining yetkazilishi boshlanganini ma'lum qildi. Bu haqda Anadolu axborot agentligi xabar berdi.

Agentlik ma'lumotlariga ko‘ra, S-400 qismlaridan iborat ilk yuk Anqaradagi “Myurted” aviabazasiga yetkazilgan.

Turkiya mudofaa vazirligining rasmiy fotosuratlarida S-400 majmualari tarkibiga kiruvchi bir nechta shatakchi va transport-quvvatlash mashinasi tasvirlangan.

Turkiyaga S-400’ning 4 ta divizionini yetkazishga shartnoma 2017 yil dekabrda imzolangandi.

Bu Vashingtonning noroziligiga sabab bo‘lgan va u Anqaraga majmualarni sotib olganlik uchun sanksiyalar joriy qilish bilan tahdid qilgan.

Biroq Osakada o‘tgan G20 sammitidan keyin Turkiya prezidenti Rajab Toyyib Erdo‘g‘an AQSh prezidenti Donald Tramp Anqaraga sanksiyalar kiritmaslikka va'da berganini ma'lum qilgan.

Avvalroq Turkiya S-400 majmualarini Suriya bilan chegarada joylashtirishni rejalashtirayotgani ma'lum qilingandi.