Tvitter 50 nafar mashhur qora tanli futbolchining akkauntini alohida nazoratga oladi

Tvitter ma'muriyati irqchilik ruhidagi haqoratlarga qarshi kurashish uchun mashhur qora tanli futbolchilardan 50 nafarining akkauntini alohida nazoratga oladigan bo‘ldi. Bu haqda The Times xabar bermoqda.

O‘tgan mavsumda ko‘plab futbolchilar rasizm muammosi ortidan ijtimoiy tarmoqlarga 24 soatlik boykot e'lon qilishgan edi.

Shundan so‘ng Tvitter, Instagram va Feysbuk vakillari bu masalani muhokama qilish uchun Angliya Professional futbolchilar assotsiatsiyasi a'zolari bilan uchrashgan.

Natijada hozirgi kelib Tvitter o‘z siyosatida yangilikka qo‘l urmoqda. Mikroblog endilikda irqchilik muammosiga qarshi yanada faolroq kurash olib boradi, jumladan 50 nafar mashhur qora tanli futbolchilarning akkauntlari doimiy ravishda tekshirib turiladi.

Bunga qadar irqchilik mazmunidagi tvitlar yoki haqoratga yo‘g‘rilgan xabarlar faqatgina ular haqida xabar berilgan taqdirdagina ko‘rib chiqilgan.