57ta pudrat korxonasi Suv xo‘jaligi vazirligi tizimidan chiqariladi

O‘zbekistonda 57ta pudrat korxonasi Suv xo‘jaligi vazirligi tizimidan chiqariladi. Bu haqda O‘zbekiston Respublikasi prezidenti Shavkat Mirziyoyev tomonidan 19 sentabr kuni suv resurslarini boshqarish tizimini isloh qilish va suvdan foydalanish samaradorligini oshirish masalalari bo‘yicha o‘tkazilgan yig‘ilishda aytildi.

Qayd etilishicha, hozirda suv obektlarini qurish, rekonstruksiya va ekspluatatsiya qilish bo‘yicha ham buyurtmachi, ham pudratchi vazifasini bitta idora – Suv xo‘jaligi vazirligi amalga oshirmoqda. Bu esa sog‘lom raqobatga salbiy ta'sir ko‘rsatishi mumkin.

Shu bois 57ta pudrat korxonasini vazirlik tizimidan chiqarib, alohida aksiyadorlik jamiyatiga birlashtirish vazifasi qo‘yildi. 

Suv iste'molchilari uyushmalari faoliyatini qayta ko‘rib chiqish zarurligi, ular investitsiya, grant va boshqa mablag‘lar jalb qila oladigan, maxsus texnikalarga ega, fermerlarga sifatli xizmat ko‘rsatuvchi professional tuzilma sifatida faoliyat yuritishi kerakligi ko‘rsatib o‘tildi.