Rishtonda bloger Dima Qayumning snosga tushgan «Xalq kutubxonasi»ga yangi joy berilib, binoga  ramziy g‘isht qo‘yildi

Farg‘ona viloyati, Rishton tumani markazida olib borilayotgan buzilish va qurilish ishlari oqibatida Dima Qayum taxallusi bilan taniqli Dilshodbek Boltaboyevning «Roshidoniy» xalq kutubxonasi ham buzilgan edi.

Blogerning xabar berishicha, unga xalq kutubxonasi bunyod etilishi uchun yangi qurilayotgan bozor hududidan joy berilgan.

Binoning birinchi ramziy g‘ishtini qo‘yish marosimida Oliy Majlis Senatining Yoshlar, madaniyat va sport masalalari qo‘mitasi raisi Iqbol Mirzo va Rishton tumani hokimi Sufhonjon Soliyevlar ishtirok etishdi.

Mutasaddilar aholi, ayniqsa yoshlar o‘rtasida kitob mutolaasi targ‘ibotini keng yoyish bo‘yicha o‘z fikr-mulohazalarini bildirdilar.

Senator Iqbol Mirzo aholi va tadbirkorlar bilan uchrashib, ularni qiynayotgan muammolarni tingladi va mavjud masalalarni yechim topishi uchun yordam berishini aytdi.