Toshkentda MOMIH dasturining vazirlar darajasidagi konferensiyasi boshlandi

Toshkentda Osiyo taraqqiyot banki va Investitsiyalar va Tashqi savdo vazirligi tomonidan tashkillashtirilgan Markaziy Osiyo mintaqaviy iqtisodiy hamkorlik dasturining (MOMIH) vazirlar darajasidagi konferensiyasi bo‘lib o‘tmoqda. 

MOMIHning asosiy maqsadi to‘rtta ustuvor sohada, jumladan, transport infratuzilmasi, bojxona hamkorligi, savdo siyosati va energetika sohasida mintaqaviy va ko‘p tomonlama hamkorlikni kengaytirish orqali Markaziy Osiyo mamlakatlarining iqtisodiy rivojlanishiga ko‘maklashishdir.

Konferensiyada Xitoy, Ozarboyjon, Gruziya, Qozog‘iston, Qirg‘iziston, Mo‘g‘uliston, Tojikiston, Afg‘oniston, Pokiston va Turkmanistonning moliya, tashqi ishlar, iqtisodiyot va savdo sohalaridagi vazirlari va davlat vakillari, shuningdek Yevropa Ittifoqi, Xalqaro valuta jamg‘armasi, Jahon bojxona tashkiloti va boshqa bir qator xalqaro tashkilotlar vakillari ishtirok etmoqda.

Konferensiyaga O‘zbekiston Respublikasi investitsiyalar va tashqi savdo vaziri S.Umrzoqov raislik qilmoqda.