Yodju texnika instituti bo‘yicha hukumat qarori qabul qilindi 

Vazirlar Mahkamasining “Toshkent shahridagi Yodju texnika instituti faoliyatini tashkil etishning qo‘shimcha chora-tadbirlari to‘g‘risida”gi qarori qabul qilindi.

Qayd etilishicha, quyidagilar:

a) “Global education school” nodavlat ta'lim muassasasi hamda “YUKET LLC” mas'uliyati cheklangan jamiyati (Koreya Respublikasi) hamkorligida tashkil etilgan “Toshkent shahridagi Yodju texnika instituti” mas'uliyati cheklangan jamiyati shaklidagi qo‘shma korxonasi o‘z faoliyatini Vazirlar Mahkamasining “Nodavlat ta'lim xizmatlari ko‘rsatish sohasidagi faoliyatini litsenziyalash tartibini takomillashtirish to‘g‘risida” 2018 yil 27 martdagi 241-son qaroriga muvofiq Vazirlar Mahkamasi huzuridagi Ta'lim sifatini nazorat qilish davlat inspeksiyasi tomonidan berilgan litsenziya asosida 2018 yilning sentabr oyidan boshlagan;

b) Muassislar tomonidan Institutning asosiy vazifalari etib:

mehnat bozorining ehtiyojlarini inobatga olgan holda, mamlakatni ijtimoiy-iqtisodiy rivojlanish istiqbollariga, shuningdek, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalarga muvofiq, arxitektura va shaharsozlik, qurilish, muqobil energiya, turizm va biznes sohalarida hamda talab yuqori bo‘lgan boshqa yo‘nalishlar bo‘yicha oliy malakali kadrlar tayyorlash;

kadrlar tayyorlashda arxitektura va shaharsozlik, qurilish, muqobil energiya, turizm va biznes sohalari bo‘yicha faoliyat olib borayotgan tashkilotlarda talabalar amaliyotini muntazam tashkil etish;

o‘quv-tarbiya jarayonini tashkil etishda xorijiy tajribani, zamonaviy pedagogik va axborot-kommunikatsiya texnologiyalarini joriy etish, o‘quv jarayoniga malakali xorijiy, xorijda tahsil olgan va malaka oshirgan mahalliy mutaxassislarni jalb etish;

ilmiy izlanishlarga ehtiyojni inobatga olgan holda arxitektura va shaharsozlik, qurilish, muqobil energiya, turizm va biznes sohalarida hamda talab yuqori bo‘lgan boshqa yo‘nalishlar bo‘yicha innovatsion va ilmiy- tadqiqot faoliyatini olib borish;

arxitektura va shaharsozlik, qurilish, muqobil energiya, turizm va biznes sohalarida ilmiy-tadqiqot va ta'lim muassasalari, tashkilotlar bilan mustahkam hamkorlik aloqalarini o‘rnatish, integratsiyani kuchaytirib borish belgilangan.

Belgilanishicha:

Institut mas'uliyati cheklangan jamiyat shaklidagi nodavlat oliy ta'lim tashkiloti hisoblanadi;

Institut rektori muassislar tomonidan O‘zbekiston Respublikasi Oliy va o‘rta maxsus ta'lim vazirligi bilan kelishilgan holda lavozimga tayinlanadi va lavozimidan ozod qilinadi;

Institutning tuzilmasi muassislar tomonidan tasdiqlanadi;

Institut ta'lim faoliyatini O‘zbekiston Respublikasining ta'lim to‘g‘risidagi qonun hujjatlari talablarini inobatga olib, O‘zbekiston Respublikasi Oliy va o‘rta maxsus ta'lim vazirligi bilan kelishgan holda Yodju texnologiya institutining (Koreya Respublikasi) o‘quv rejalari va dasturlari asosida o‘zbek, rus va ingliz tillarida amalga oshiradi;

Institut bitiruvchilariga O‘zbekiston Respublikasida oliy ma'lumot to‘g‘risidagi hujjat sifatida e'tirof etiladigan belgilangan namunadagi diplom beriladi;

Institutga talabalar qabuli umumiy o‘rta, o‘rta maxsus, kasb-hunar ma'lumotga ega abituriyentlar o‘rtasida kirish imtihonlarini Yodju texnologiya instituti (Koreya Respublikasi) tomonidan (yoki ishtirokida) o‘tkazish orqali amalga oshiriladi;

abituriyentlarni qabul qilish parametrlari va tartibi, bitiruvchilarning yakuniy attestatsiyasi tartibi va shartlari Institut tomonidan Yodju texnologiya instituti (Koreya Respublikasi) bilan kelishilgan holda belgilanadi;

Institutda o‘qish to‘lov-kontrakt asosida, kunduzgi, sirtqi va kechki shaklda amalga oshiriladi, talabalar o‘qishi uchun to‘lov-kontrakt mablag‘lari miqdori muassislar tomonidan belgilanadi.

Muassisning har yili ijtimoiy himoyaga muhtoj oilalarning qobiliyatli, iqtidorli hamda o‘zlashtirish ko‘rsatkichlari yuqori bo‘lgan farzandlari orasidan tanlov asosida bepul (Institut granti asosida) 10 nafardan kam bo‘lmagan abituriyentlarni o‘qishga qabul qilish majburiyatlarni o‘z zimmasiga olishi to‘g‘risidagi taklifi ma'qullandi.

Belgilab qo‘yilishicha, Institutning bino va inshootlarini rekonstruksiya qilish va kapital ta'mirlash, uni o‘quv va laboratoriya jihozlari, mebel, kompyuter texnikasi, o‘quv va uslubiy adabiyotlar, shuningdek, boshqa moddiy-texnik jihozlar bilan ta'minlash quyidagi manbalar hisobiga amalga oshiriladi:

Institut muassislari mablag‘lari;

to‘lov-kontrakt asosida o‘qitishdan tushadigan mablag‘lar;

xo‘jalik faoliyatidan va shartnoma asosida xizmatlar ko‘rsatishdan tushadigan tushumlar;

jismoniy va yuridik shaxslarning homiylik xayriyalari;

xalqaro moliya tashkilotlarining grantlari, shuningdek, xorijiy hamkorlarning mablag‘lari;

qonun hujjatlarida taqiqlanmagan boshqa manbalar.

Institutga O‘zbekiston Respublikasi Vazirlar Mahkamasi huzuridagi Ta'lim sifatini nazorat qilish davlat inspeksiyasi, Oliy va o‘rta maxsus ta'lim vazirligi hamda Yodju texnologiya instituti (Koreya Respublikasi) bilan kelishilgan holda, mehnat bozori talablari va ijtimoiy-iqtisodiy rivojlanish istiqbollaridan kelib chiqib, kelgusida yangi bakalavriat ta'lim yo‘nalishlari va magistratura mutaxassisliklarini ochish huquqi berildi.