Makron Rossiyaning Fransiyadagi saylovlarga aralashishi kutilayotganini aytdi

Rossiya tomoni Fransiyadagi saylovlarga ta'sir ko‘rsatishga urinishdan voz kechmaydi, dedi Fransiya prezidenti Emmanuel Makron.

"Rossiya tajovuzkorona harakat qilmoqda. Bu yaqin oylar va yillarda davom etaveradi deb o‘ylayman", - dedi u Myunxenda xavfsizlik bo‘yicha o‘tkazilgan konferensiyada.

Makronning izohlashicha, bunday faoliyat "kutilmaganda bir lahza ichida to‘xtatilmaydi". Uning so‘zlariga ko‘ra, shu bois Rossiya "G‘arb demokratiyasini izdan chiqarishga urinishda" davom etadi.

Uning fikricha, Rossiya Xitoy bilan mustahkam ittifoqchilik munosabatlarini o‘rnata olmaydi, chunki unga Yevropada hamkorlar kerak. Makron Xitoy odatda boshqa davlatlar bilan yaqin ittifoqchilik munosabatlarini o‘rnatmasligini aytdi. Uning so‘zlariga ko‘ra, Rossiya Pekin bilan o‘ta yaqinlashishdan ehtiyot bo‘lishi lozim.