Xatirchida nasos va o‘g‘it o‘g‘irlaganlar qo‘lga olindi: ularning navbatdagi «mo‘ljali» qo‘y va g‘alla bo‘lgan

2020 yilning 22 fevral kuni ertalabki soat 08:15da Navoiy viloyati Xatirchi tumani IIB navbatchilik qismiga tezkor chaqiruv kelib tushdi. Unga ko‘ra, «Xo‘jaqo‘rg‘on» MFYda yashovchi M.H.ning yashash xonadonidan qiymati 2 mln so‘mlik suv chiqarish agregati (nasos) o‘g‘irlab ketilgan ekan. 

Navoiy viloyat IIB axborot xizmatining Kun.uz’ga taqdim etgan ma'lumotiga ko‘ra, bir guruh IIB xodimlari, jumladan, hudud profilaktika inspektori va uning jamoat tartibini saqlash bo‘yicha yordamchilari tomonidan tezkor profilaktik tadbirlar o‘tkazilib, ushbu jinoyatni qilgan shaxslar aniqlanib, jinoyat ishi ochilgan. 

Ushbu jinoyat 1998 yilda tug‘ilgan B.X. va 2004 yilda tug‘ilgan voyaga yetmagan T.X. tomonidan sodir etilganligi aniqlangan. 

Shuningdek, tergov surishtiruvlar natijasida shu yilning 16 fevral kuni «Xo‘jaqo‘rg‘on» MFYda yashovchi fuqarolar F.D., S.R., B.X. hamda voyaga etmagan T.X. o‘zaro jinoiy til biriktirib, shu tumandagi «Miyonqol» MFYda yashovchi F.O. xonadonidan jami 950 ming so‘mlik fosforli o‘g‘itni o‘g‘irlab chiqib, sotmoqchi bo‘lib yurgan vaqtida — 23 fevral kuni daliliy ashyolar bilan qo‘lga olingan. 

Tergov-surishtiruv davomida aniqlanishicha, xuddi shu fuqarolar tomonidan oldindan jinoiy biriktirib, sherikchilik asosida hamqishlog‘i B.Sh. xonadonidan qo‘ylarini va shu mahalla hududida joylashgan «R.B.» fermer xo‘jaligi dala shiyponida joylashgan omborxonasidan g‘alla o‘g‘irlashni rejalashtirayotganligi aniqlanib, 2ta jinoyatning oldi olindi. 

Ushbu jinoyatlarning aniqlanishi va ochilishida profilaktika inspektorining jamoat tartibini saqlash bo‘yicha yordamchisi Ch.Rajabovning faolligi muhim rol o‘ynagan. Ichki ishlar organlarida bunday lavozim tashkil etilganiga bir yil to‘lmasdan, joylarda jinoyatlarni ochish va ularni barvaqt oldi olinishida o‘z samarasini bermoqda.