Foto: Talabalar shaharchasidan 30 mingga yaqin talaba uyiga jo‘natildi

16 mart kuni Toshkent shahridagi OTMlarda tahsil olayotgan talabalarni doimiy yashash joylariga kuzatish ishlari boshlandi. Bu haqda Oliy va o‘rta maxsus ta'lim vazirligi xabar berdi.

Foto: Oliy va o‘rta maxsus ta'lim vazirligi

Asosan Toshkent moliya instituti, O‘zbekiston Milliy universiteti, Islom akademiyasi, Toshkent davlat texnika universiteti talabalari vazirlik huzuridagi «Ma'naviyat va ma'rifat markazi» binosi hududidan tezyurar avtobuslarda manzillariga jo‘natildi.

Ayni vaqtga qadar 30 000 nafarga yaqin talaba markazlashtirilgan tartibda Toshkent shahridan o‘zlari yashaydigan viloyatlarga jo‘nab ketdi.

Foto: Oliy va o‘rta maxsus ta'lim vazirligi

«Talabalarga qulaylik yaratish maqsadida markaz binosida imtiyozli chiptalar sotilishi yo‘lga qo‘yildi va bir vaqtning o‘zida avtobuslarda ketish imkoniyati yaratildi», – deyiladi xabarda.

Jarayon barcha talabalarni o‘z manzillariga kuzatishni qamrab oladi va 16 martda ham davom etadi.

Eslatib o‘tamiz, 16 martdan e'tiboran ham davlat, ham nodavlat OTMlarda o‘qish to‘xtatilib, o‘quvchi-talabalar ikki hafta muddatga (hozircha) ta'tilga chiqarildi.

Talabalar ikki haftalik ta'tilga chiqarildi (batafsil)