Karantin davrida bloklanib qolgan bank kartalari onlayn murojaat orqali blokdan chiqariladi – MB

Karantin davrida bank plastik kartalarni blokdan chiqarish uchun murojaatlarni masofadan — onlayn qabul qilish imkoniyati mavjud. Bunda tijorat banklari axborot kommunikatsiya tizimi orqali kelgan murojaatni o‘rganib chiqib, fuqaro bilan bog‘lanadi va kartani blokdan chiqarib berishadi.

4 aprel kuni AOKA qoshidagi maxsus shtabda tashkil etilgan onlayn brifingda Markaziy bank boshqarma boshlig‘i Husanxo‘ja Obidov karantin davrida blokka tushib qolgan bank kartalarini qanday qilib blokdan chiqarish mumkinligi to‘g‘risida ma'lumot berdi.

«Bugungi kunda tijorat banklarida plastik kartalarni blokdan chiqarish uchun murojaatlarni masofadan — onlayn qabul qilish imkoniyati mavjud. Bunda tijorat banklari axborot kommunikatsiya tizimi orqali kelgan murojaatni o‘rganib chiqib, fuqaro bilan bog‘lanadi.

Shundan so‘ng bank xodimi mijoz manfaatlarini himoya qilgan holda masofadan turib zaruriy rekvizitlarni aniqlashtiradi va bank kartasi blokdan chiqariladi» , — deya qayd etdi Husanxo‘ja Obidov.

Bundan tashqari, Husanxo‘ja Obidov har bir karta egasining shaxsiy identifikatsiya raqami — sheet code  mavjudiligini va savdo nuqtalarida xarid amalga oshirganda fuqarolardan mana shu sheet code'ni shaxsan o‘zlari kiritishi lozimligini ta'kidladi.