Fransiyada mamlakat ichida harakatlanishga nisbatan cheklovlar uzaytirildi

Fransiya prezidenti Emmanuel Makron koronavirus epidemiyasi sababli joriy etilgan mamlakat ichida harakatlanishga nisbatan cheklovlarni 11 maygacha uzaytirdi.

U bu haqda televideniye orqali xalqqa murojaatida e'lon qildi.

"Umid qaytmoqda, ammo Grad-Est hamda Il-de-Frans regionida kasalxonalar to‘lib ketgan. Shu bois sa'y-harakatlarimiz va qoidalarni davom ettirishimiz shart. Qat'iy izolyatsiya tartibi 11 may kunigacha saqlanib turadi", - dedi Makron.

U "kelgusi to‘rt hafta davomida hukumat tomonidan joriy etilgan choralar saqlanib qolishini, kuchaytirilmasligi va bo‘shashtirilmasligi"ni aytdi.

Koronavirus tarqalishi sababli Fransiya hukumati qarori bilan mamlakatda qahvaxona, restoran, kinoteatr va nooziq-ovqat do‘konlari yopilgan. 17 martdan aholi harakatlanishiga nisbatan qat'iy cheklovlar o‘rnatilgan.  

Oxirgi ma'lumotlarga ko‘ra, Fransiyada koronavirusga chalinish bilan bog‘liq 137 mingdan ortiq holat aniqlangan, 15 mingga yaqin kishi vafot etgan.