Rossiyadagi shaharlardan biri koronavirus tarqalgani sababli yopildi

Qariyalar uyida koronavirus tarqalgani sababli Rossiyaning Smolensk oblastidagi Vyazma shahriga kirish-chiqish to‘xtatildi. Bu haqda mahalliy ma'muriyatga tayanib RT xabar berdi.

«Vyazmada epidemiologik vaziyat yomonlashgani sababli 12 apreldan 30 aprelgacha shaharda yashash ro‘yxatida turmaydigan fuqarolarning  shahar hududiga kirishi va chiqishiga cheklov o‘rnatiladi», — deb ma'lum qildi ma'muriyat.

Qayd etilishicha, qariyalar uyidagi 86 kishi koronavirusga chalingani gumon qilinganidan so‘ng ushbu cheklov joriy etilgan. Hozirga qadar 306 kishi, jumladan xodimlar tekshiruvdan o‘tkazilgan, xodimlardan birida kasallik aniqlangan.

Mash Telegram-kanalining xabar berishicha, u yaqinda ta'tilni Vetnamda o‘tkazib qaytgan bo‘lgan. Hozirda muassasa karantinga olingan.

Oxirgi ma'lumotlarga ko‘ra, Rossiyada koronavirus yuqtirganlar soni 15,5 mingdan oshgan. Mamlakatda epidemiya boshlanganidan beri 130 kishi vafot etgan, 1291 kishi tuzalgan.