Maxsus komissiya hamyurtlarimizni xorijdan olib kelish uchun charter reyslar tashkil etish to‘g‘risida alohida qaror qabul qiladi - TIV

Tashqi ishlar vazirligi chet elda bo‘lib turgan O‘zbekiston fuqarolari va mamlakatdagi xorijiy fuqarolarga murojaat bilan chiqdi

Foto: Sog‘liqni saqlash vazirligi axborot xizmati

Respublika maxsus komissiyasi hamyurtlarimizni xorijdan olib kelish uchun charter reyslarini tashkil etish to‘g‘risida alohida qaror qabul qiladi. Bu haqda Tashqi ishlar vazirligi xabar bermoqda.

Qayd etilishicha, Respublika maxsus komissiyasi koronavirus infeksiyasi keng tarqalishining oldini olishga qaratilgan barcha cheklovchi choralarni 2020 yil 10 mayga qadar uzaytirish to‘g‘risida qaror qabul qildi.

Shuningdek, xorijiy fuqarolarga berilgan viza muddatlari joriy yil 1 iyunga qadar avtomatik uzaytiriladi, muayyan muddatga vizasiz kirish huquqiga ega bo‘lgan davlatlar fuqarolariga (agar belgilangan muddat buzilgan taqdirda) istisno tariqasida mamlakatdan chiqib ketishiga joriy yilning 1 iyuniga qadar ruxsat beriladi, ularga nisbatan javobgarlik choralari qo‘llanilmaydi.

“Shu bilan birga, Respublika maxsus komissiyasi hamyurtlarimizni xorijdan olib kelish uchun charter reyslarini tashkil etish to‘g‘risida alohida qaror qabul qilishini eslatamiz.

Maxsus komissiyaning ushbu qarori, shuningdek, charter reyslarining sanasi va yo‘nalishlari to‘g‘risidagi ma'lumot rasmiy internet-manbalar orqali qo‘shimcha ravishda tarqatiladi”, - deyiladi xabarda.