Moskvada joylashgan Yevropaning eng yirik avtomarkazlaridan biri kasalxonaga aylantiriladi

Moskvaning Kashirskoye shossesidagi «Moskva» avtomobillar savdo markazi maydonini ijaraga oluvchilardan u yerni bo‘shatishni so‘rashdi. Bu haqda RBKga avtosalonlar maydonlarini ijaraga oluvchilarning xodimlari ma'lum qildi. Qayd etilishicha, «Moskva» avtomarkazini koronavirusga chalinganlarni davolash uchun kasalxonaga aylantirish rejalashtirilgan.

Xodimlardan birining aytishicha, ma'muriyat avtomarkaz 1 avgustgacha kasalxona vazifasini o‘tashini ma'lum qilgan.

«Moskva» avtomobillar savdo markazi Yevropadagi eng yirik avtomarkazlardan biridir. Bu yerda yangi va minilgan mashinalar sotiladi. Majmuaning umumiy maydoni 110 ming kv. metrni tashkil etadi. Bu yerda 200dan ortiq avtosalon, 500ta avtomobillar ehtiyot qismlari do‘koni joylashgan.

27 aprel kuni Moskva oblasti gubernatori Andrey Vorobev «Patriot» parki va «Krokus Siti Xoll» konsert zalining har birida 1,5 ming bemorga mo‘ljallangan kasalxonalar tashkil etilishini ma'lum qildi.

So‘nggi ma'lumotlarga ko‘ra, Rossiyada koronavirusga chalinganlar soni 93,5 mingdan oshgan, bemorlarning 48 mingdan ortig‘i Moskvada aniqlangan. Mamlakat bo‘yicha 867 kishi vafot etgan (Moskvada 479 kishi).