Putin Rossiyada ishlanmaydigan kunlar muddatini uzaytirdi

Rossiya prezidenti Vladimir Putin koronavirus tarqalishiga qarshi kurashish maqsadida ilgari joriy etilgan “ishlanmaydigan kunlar” muddatini uzaytirdi. U 11 maygacha muddatni ishlanmaydigan kunlar deb e'lon qildi.

Putin buni epidemiya Rossiyada hali cho‘qqisiga chiqmaganligi uchun koronavirusga qarshi qat'iy kurash choralarini uzaytirish zarurligi bilan izohladi.

«Biz hozirda epidemiya bilan kurashning yangi, keskin bosqichida turibmiz. Biz epidemiya to‘lqini susayib, pasayishiga erishishimiz lozim», — dedi Putin.

U shuningdek, Ikkinchi jahon urushidagi g‘alabaning 75 yilligini nishonlashga ham to‘xtalib o‘tdi.

"G‘alabaning 75 yilligiga bag‘ishlab rejalashtirganlarimizning barchasi albatta bo‘ladi. Qizil maydonda parad va "O‘lmas polk" yurishini ham o‘tkazamiz. G‘alaba bayramini vaziyat to‘liq xavfsizligiga ishonch hosil qilganimizda nishonlaymiz", - dedi u rossiyaliklarga murojaatida.

Rossiya prezidenti 25 mart kuni xalqqa qilgan murojaatida 30 martdan 5 aprelgacha ishlanmaydigan hafta e'lon qilgandi. Putin 2 aprel kuni yangi murojaat bilan chiqdi va ishlanmaydigan kunlar muddatini 30 aprelgacha uzaytirdi.

28 aprel kuni Rossiya koronavirusga chalinganlar soni bo‘yicha Eronni ortda qoldirib, dunyoda sakkizinchi  o‘ringa chiqdi. Mamlakatda bu kasallikni yuqtirganlar soni 93,5 mingdan oshgan, 800dan ortiq kishi vafot etgan.