2021 yil 1 yanvargacha bo‘lgan davrda turistik yig‘imni hisoblash va to‘lash to‘xtatiladi

Turoperatorlar, turagentlar, shuningdek joylashtirish vositalari uchun 2020 yil 1 iyundan 31 dekabriga qadar foyda solig‘i stavkasi belgilangan stavkaga nisbatan 50 foizga kamaytiriladi.

O‘zbekiston prezidenti Shavkat Mirziyoyev “Koronavirus pandemiyasining salbiy ta'sirini kamaytirish uchun turizm sohasini qo‘llab-quvvatlashga doir kechiktirib bo‘lmaydigan chora-tadbirlar to‘g‘risida”gi farmonni imzoladi. Bu haqda Turizmni rivojlantirish davlat qo‘mitasi matbuot xizmati xabar berdi.

Hujjatga ko‘ra, turoperatorlar, turagentlar, shuningdek joylashtirish vositalari uchun:

2020 yil 1 iyundan 31 dekabriga qadar foyda solig‘i stavkasi belgilangan stavkaga nisbatan 50 foizga kamaytiriladi;
2020 va 2021 yil yakunlari bo‘yicha zararlarni O‘zbekiston Respublikasi Soliq kodeksida nazarda tutilgan miqdor bilan cheklamagan tarzda o‘tkazish huquqi beriladi;
2021 yil 1 yanvargacha bo‘lgan davrda turistik (mehmonxona) yig‘imini hisoblash va to‘lash to‘xtatiladi.

Joylashtirish vositalariga alkogol mahsulotlari bilan chakana savdo qilish huquqi uchun mahalliy yig‘imni to‘lashni 2021 yil 1 yanvargacha bo‘lgan muddatga soliq organlarini xabardor qilish va keyinchalik ularni 12 oy mobaynida teng qismlarda to‘lash asosida foizsiz kechiktirish (bo‘lib-bo‘lib to‘lash) huquqi taqdim etiladi.

Prezident farmoni: Turizm sohasida faoliyat ko‘rsatuvchilar uchun subsidiya va grantlar ajratiladi