Braziliyada koronavirus yuqtirganlar soni 1 milliondan oshdi, qurbonlar 50 mingga yaqinlashdi

Braziliyada koronavirus yuqtirganlar soni 1 milliondan oshdi. Worldometers ma'lumotiga ko‘ra, ayni damda mamlakatda virus yuqtirganlar soni 1 million 38 mingdan ko‘proqni tashkil etmoqda.

Ortda qolgan bir kun davomida 55 mingdan ortiq braziliyalikda virus aniqlangan va bu yangi kunlik rekord hisoblanadi. Kasallik mamlakatda yana 1 238 kishining umriga zomin bo‘ldi va Braziliyada virus qurbonlari soni 49 mingdan oshdi. Hozirgacha 520 mingdan ortiq odam virusdan tuzalgan.

Ma'lumot uchun, Braziliya virus yuqtirganlar soni 1 milliondan oshgan ikkinchi davlatga aylandi. Hozirgacha faqat AQShda 1 milliondan ko‘proq (2,96 million) odam virus yuqtirgandi. O‘tkazilgan testlar soni bo‘yicha esa bu ikki davlat o‘rtasida farq katta. Braziliya 2,3 milliondan ortiq test o‘tkazgan bo‘lsa, AQShda bu ko‘rsatkich 27,3 million oshadi.

Ayni damda butun dunyoda koronavirus yuqtirganlar soni 8,75 milliondan oshgan. Zararlanish holatlari bo‘yicha AQSh va Braziliyadan keyingi o‘rinlarda Rossiya (569 ming), Hindiston (395 ming) va Britaniya (301 ming) bormoqda.