Qozog‘istonda koronavirus bilan bog‘liq vaziyat yomonlashgani sababli karantin choralari kuchaytiriladi

To‘qayev hukumatni "qat'iy choralar qabul qilish bilan bir qatorda uzoq davom etadigan koronavirus pandemiyasiga tayyorgarlik ko‘rish"ga chaqirdi.

Foto: 24.kz

Qozog‘iston prezidenti Qosim-Jo‘mart To‘qayev hukumatga ikki kun ichida qat'iy karantin choralarini joriy etish to‘g‘risida taklif kiritish topshirig‘ini berdi.

Bundan tashqari, Qozog‘iston prezidenti hukumat va regionlar rahbarlariga infeksion koykalar sonini oshirish hamda mamlakatda dori-darmon taqchilligiga barham berishga topshiriq berdi.

To‘qayev shuningdek, hukumatni "qat'iy choralar qabul qilish bilan bir qatorda uzoq davom etadigan koronavirus pandemiyasiga tayyorgarlik ko‘rish"ga chaqirdi.

Oxirgi ma'lumotlarga ko‘ra, mamlakatda 21,3 mingdan ortiq COVID-19 bilan kasallanish holatlari qayd etilgan, 16 639 nafar simptomsiz virus tashuvchilar aniqlangan, 183 kishi vafot etgan.