Ramzan Qodirov «Grozniy» telekanalining sahifalariga obuna bo‘lmaganlarni «xavfli odamlar» deb atadi

Checheniston rahbari Ramzan Qodirov respublikadagi Xoy qishlog‘ida o‘tkazilgan kengaytirilgan yig‘ilishda barcha rahbarlarni ChGTRKning (Checheniston davlat teleradiokompaniyasi) «Grozniy» telekanali sahifalariga obuna bo‘lishga chaqirdi.

«Tushunmayman, qanday qilib Instagramda sahifasi bo‘lgan odam ChGTRKning «Grozniy» telekanali sahifasiga obuna bo‘lmasligi mumkin? Axir hamma yangiliklar o‘sha yerda-ku! O‘z vatanida bo‘layotgan yangiliklarni bilmay turib qanday yaxshi ishlash mumkin?

Ularni davlat xodimi, buning ustiga bizning yo‘ldoshimiz bo‘lgan birodar deb bo‘lmaydi. Agar kimki «Grozniy»ning YouTube va VKontaktedagi sahifalariga a'zo bo‘lmasa, u biz uchun xavfli inson», degan Qodirov.

Ma'lumot uchun, Checheniston aholisi 1,4 million kishiga yaqin. ChGTRKning «Grozniy» telekanalini esa YouTube'da 426 mingdan ko‘proq o‘quvchi kuzatib boradi. Bu respublika aholisining deyarli 30 foiziga teng degani.