Vengriya bosh vaziri noqonuniy muhojirlarni “biologik bomba”ga qiyosladi

“Bosh vazirning ta'kidlashicha, Vengriyaga noqonuniy yoki nazoratsiz kirmoqchi bo‘layotgan har bir muhojir Vengriya uchun biologik va tibbiy xavf bildiradi. Biz buni har qanday yo‘l bilan bartaraf etishimiz lozim”, deb aytilgan Vengriya hukumati saytida joylangan bayonotda. Orban yuqorida keltirilgan so‘zlarni Kossuth radiostansiyasi efirida aytib o‘tgan.

Uning ta'kidlashicha, har bir noqonuniy muhojirni “infeksiyaning ehtimoliy tarqatuvchisi” sifatida baholash kerak.

Orbanning aytishicha, uning “keskin bayonoti” huquq himoyachilariga qaratilgan. U, shuningdek, ichki ishlar vazirligidan politsiya xodimlari va harbiylar chegarani noqonuniy kesib o‘tishga har bir urinishning oldini olishlarini so‘ragan, chunki ayni vaqtda muhojirlar ham aholi sog‘lig‘iga xavf soladi. 

“Biz migratsiya va koronavirus epidemiyasi haqida bir vaqtda gapirganda, go‘yoki har bir muhojir “biologik bomba” hisoblanishi kabi tasavvur hosil qilmasligimiz lozim. Biroq aslida esa ulardan ba'zilari shundaylar [“biologik bomba”] va muammo shundaki, aynan kim shunday ekanligini aniqlashning yo‘li yo‘q”, deb ta'kidlab o‘tgan Orban.

Bosh vazirning ma'lum qilishicha, Vengriya Yevropa ittifoqidan koronavirusga qarshi vaksinadan 5 mln doza buyurtirgan. 

Oxirgi ma'lumotlarga ko‘ra, Vengriyada koronavirusga chalinganlar soni 4,6 mingdan oshib ketgan. Jumladan, virusdan 602 kishi vafot etgan, 3,4 mingdan ko‘proq bemor sog‘ayib ketgan.