Qashqadaryodagi tijorat banklari prokuratura nazoratiga olinadi. Ammo bu qonunga zid

Suhbat davomida, Qarshi tumani Xonobod hududidan 27 nafar tadbirkorlarga issiqxona qurish uchun tuman hokimining qarori bilan 124 gektar yer maydoni ajratilgani, biroq ular kredit olish uchun tijorat banklariga zarur hujjatlarni topshirganiga qaramasdan, bank xodimlari moliyaviy resurs yo‘qligini ro‘kach qilib, tadbirkorlarga hamon kredit ajratishni ortga surib kelayotgani aytilgan.

Bu holatning oldini olish maqsadida Z.Mirzayevning topshirig‘i bilan viloyat prokuraturasi xodimlaridan iborat ishchi guruhi tuzilib, hududdagi tijorat banklari tomonidan ko‘rsatilayotgan xizmatlarni o‘rganish vazifasi yuklatilgan.

Bu haqidagi xabar Qashqadaryo viloyat prokuraturasining «Telegram»dagi kanaliga joylangan.

Iqtisodchi – bloger Otabek Bakirov o‘zining «Telegram» kanalida ushbu xabarga o‘z munosabatini qoldirgan. Iqtisodchining fikriga ko‘ra, bu banklarning mustaqilligiga zid qaror hisoblanadi.

Darhaqiqat, «Banklar va bank faoliyati to‘g‘risida»gi (yangi tahriri) qonunning 8-moddasiga (banklarning mustaqilligi) ko‘ra, banklar moliyaviy operatsiyalarni amalga oshirish bilan bog‘liq qarorlar qabul qilishda mustaqildir. Davlat organlari va ularning mansabdor shaxslariga banklar faoliyatiga, shu jumladan banklarning kredit portfelini va aktivlarini shakllantirish bilan bog‘liq tadbirkorlik tavakkalchiliklarini boshqarishga, banklarning rahbar xodimlarini tayinlashga aralashish, shuningdek bankning mablag‘lari hisobidan turli xil to‘lovlar va badallar talab qilish taqiqlanadi.