Xitoydagi shaharda jadallik bilan koronavirusga qarshi emlash boshlanishi e'lon qilindi

Xitoyning Chjetszyan provinsiyasida joylashgan Tszyasin shahrida Sinovac kompaniyasining koronavirusga qarshi vaksinasi bilan emlash boshlanishi e'lon qilindi. Biroq vaksina hali to‘liq sinovlardan o‘tkazib bo‘linmagan.

Foto: REUTERS/Thomas Peter

Paper nashrining mahalliy kasalliklarni nazorat qilish va oldini olish markazi vakiliga tayanib xabar berishicha, shahar ma'muriyati Sinovac vaksinasiga buyurtma bergan va hozirda vaksinalar emlash punktlariga yetkazilmoqda.

“O‘ylashimcha, agar pandemiya va kuz-qish mavsumi yaqinlashmaganda, ushbu emlash vaksina bozorda paydo bo‘lgandan keyingina e'lon qilingan bo‘lardi”, deb ma'lum qilgan markaz vakili.

Uning ta'kidlashicha, vaksinani birinchi navbatda tibbiy xodimlar, chegara nazorati xodimlari oladi. Emlashni, shuningdek, jamoat joylarida ishlovchilar va koronavirusga chalinish xavfi yuqori yoki o‘rta bo‘lgan davlatlarda bo‘lib qaytganlarda o‘tkazish qat'iy tavsiya qilingan.

Emlash ixtiyoriy asosda o‘tkaziladi. Vaksina 18 yoshdan 59 yoshgacha bo‘lgan odamlargagina qo‘llanadi.