Rossiyada ishlab chiqilgan birinchi vaksinaning taxminiy narxi ma'lum qilindi

Rossiyada koronavirusga qarshi ishlab chiqilgan “Sputnik V” vaksinasining bir dozasi narxi 10 dollardan kamroqni tashkil qiladi. Bu haqda Rossiyaning to‘g‘ridan to‘g‘ri investitsiyalar jamg‘armasi (RFPI) rahbari Kirill Dmitriyev BMT Bosh assambleyasining maxsus sessiyasida ma'lum qildi.

Foto: Natalia Kolesnikova / AFP

Dmitriyevning ta'kidlashicha, Gamaleya nomidagi markaz ishlab chiqqan vaksina boshqa vaksinalardan ancha arzonroq bo‘ladi. Rossiyaliklar uchun vaksina bepul taqdim etiladi.

Ayni vaqtda Rossiya vaksinasiga 50dan ko‘proq davlatda qiziqish bildirilgan. RFPI vaksinani Hindiston, Braziliya, Xitoy va boshqa davlatlardagi hamkorlari bilan ishlab chiqarishga kelishib olgan.

Taqqoslash uchun aytish mumkinki, Pfizer va BioNTech kompaniyalarining vaksinasi bir dozasi 19,5 dollar, Moderna kompaniyasiniki esa 25-37 dollar turadi.

“Sputnik V” avgust oyida dunyoda birinchi bo‘lib ro‘yxatdan o‘tkazilgandi.