Turkmanistonda birinchi sinf o‘quvchilariga mamlakatda ishlab chiqarilgan kompyuterlar sovg‘a qilinadi

Turkmaniston prezidenti Gurbanguli Berdimuhamedov birinchi sinf o‘quvchilariga yangi yil sovg‘asi sifatida mamlakatda ishlab chiqarilgan kompyuterlarni tuhfa etish topshirig‘ini berdi. Bu haqda Turkmaniston davlat axborot agentligi xabar qilmoqda.

Xabarda aytilishicha, bosh vazirning ta'lim va fan masalalari bo‘yicha o‘rinbosari Mammetmirat Geldiniyazov prezidentga Agzybirlik tilsimaty korxonasi birinchi sinf o‘quvchilariga mo‘ljallangan kompyuterlarni ishlab chiqargani to‘g‘risida hisobot bergan.

Uning qo‘shimcha qilishicha, kompyuterlarning texnik ko‘rsatkichlari jahon standartlariga javob beradi. Ularga o‘rnatilgan dasturlar ta'lim beruvchi turli vazifalarni bajaradi va uchta: turkman, rus va ingliz tillarida ishlaydi.

 Qayd etilishicha, Berdimuhamedov bosh vazir o‘rinbosariga ushbu kompyuterlarni birinchi sinf o‘quvchilariga taqdim etish ishlarini tashkillashtirishni buyurgan.