Putin Rossiyada koronavirus cheklovlari bosqichma-bosqich olib tashlanishini aytdi

Rossiyada koronavirus bilan bog‘liq vaziyat barqarorlashmoqda, pandemiya sababli kiritilgan cheklovlarni bosqichma-bosqich olib tashlash mumkin. Bu haqda Rossiya prezidenti Vladimir Putin talabalar bilan bo‘lgan onlayn uchrashuvda aytdi.

«Umuman olganda, mamlakatda epidemiologik vaziyat barqarorlashmoqda. Bugun hisobotlarda eshitdim: sog‘ayganlar soni bemorlar sonidan oshgan», — dedi u.

Putin Moskvada ham vaziyat iziga tushayotganligini aytdi.

«Bu kiritilgan cheklovlarni olib tashlash imkoniyatini beradi», — dedi Rossiya rahbari.

 Vaziyat yaxshilanishi ortidan Moskvada 22 yanvardan cheklovlarning bir qismi olib tashlandi. Poytaxtda muzey, kutubxona va boshqa madaniyat muassasalari faoliyati tiklandi, kollejlar, sport maktablari va bolalar ko‘ngilochar muassasalari odatiy ish tartibiga qaytdi.

Maktab o‘quvchilariga 18 yanvardan an'anaviy ta'lim shakliga qaytishga ruxsat berildi. Oliy ta'lim muassasalarida esa 6 fevralgacha onlayn ta'lim shakli saqlanib qoladi.