Blinken Turkiyani S-400dan voz kechishga chaqirdi

AQSh davlat kotibi Entoni Blinken Turkiya tashqi ishlar vaziri Mavlut Chovusho‘g‘lu bilan telefon orqali muloqoti chog‘ida Anqarani Rossiyaning S-400 zenit-raketa tizimlaridan voz kechishga chaqirdi.

"Davlat kotibi Turkiyani Rossiyaning s-400 raketa tizimlarini o‘zida qoldirmaslikka chaqirdi. Entoni Blinken Turkiya va Gretsiya o‘rtasida davom etayotgan muzokaralarni qo‘llab-quvvatlashini bildirdi", - deyiladi AQSh davlat departamenti xabarida.

Ikki mamlakat tashqi ishlar vazirlari muloqoti haqida Turkiya tashqi ishlar vazirligi ham xabar berdi. Vazirlikning xabariga ko‘ra, "ikki tomonlama munosabatlarning barcha jihatlari", jumladan, Rossiya zenit-raketa tizimlari muhokama qilingan.

Turkiya va AQSh o‘rtasidagi munosabatlarda sovuqchilik tushishiga sabab bo‘lgan S-400 tizimlari Turkiyaga 2019 yil iyuldan boshlab yetkazilgandi.

Vashington Anqaraga ushbu bitimdan voz kechishni va Turkiyaga F-35 qiruvchi samolyotlari sotishni bekor qilish va sanksiyalar kiritish bilan tahdid qilib, S-400 o‘rniga AQShning Patriot majmualarini sotib olishni taklif qilgandi.

11 yanvar kuni Turkiya mudofaa sanoati kotibiyati rahbari Ismoil Demir S-400 zenit-raketa tizimlari foydalanishga tayyor holga keltirilganini ma'lum qildi.