Andijonda banklar tomonidan ajratilgan imtiyozli kredit mablag‘lari talon-toroj qilingani aniqlandi

Monitoring natijalariga ko‘ra, «Xalq banki» Kuyganyor filialidan «Development Innovation» MChJga 2020 yil noyabrdagi kredit shartnomasiga asosan avtomobillarga texnik xizmat ko‘rsatish uchun ajratilgan 550 mln so‘m imtiyozli kredit talon-toroj qilingani aniqlangan.

Mazkur mablag‘ «Alliance Traiding House» MChJga uskunalar sotib olish uchun o‘tkazilgan. Biroq o‘rganish davomida kredit oluvchi ko‘rsatgan manzilda uskunalar mavjud emasligi ma'lum bo‘lgan.

Shuningdek, ushbu bank tomonidan «Xikmatullox Tekstil» MChJga 2020 yil noyabrida xizmat ko‘rsatish yo‘nalishida 400 mln so‘m imtiyozli kredit ajratilgan. Ushbu mablag‘ «Alliance Premium House» MChJga tikuvchilik uskunalari sotib olish uchun o‘tkazilgan. Tekshirish natijasida imtiyozli kredit mablag‘i hisobiga tikuv dastgohlari olib kelinmagani, bank va xo‘jalik yurituvchi sub'yektlar rahbarlari tomonidan mazkur imtiyozli kredit mablag‘i o‘zlashtirilgani aniqlangan.

Davlat xavfsizlik xizmati Andijon viloyat boshqarmasi Kun.uz’ga ma'lum qilishicha, mazkur materiallarga asosan joriy yilning 22 fevral kuni Andijon tuman prokuraturasi tomonidan «Alliance Premium House» va «Alliance Traiding House» MChJlar rahbari K.X., «Development Innovation» MChJ rahbari M.S. va «Xikmatullox Tekstil» MChJ rahbari X.H. hamda «Xalq banki» Kuyganyor filiali mansabdor shaxslariga nisbatan JKning 167-moddasi 3-qismi va 209-moddasi 2-qismi bilan jinoyat ishi qo‘zg‘atilgan.

«Alliance Premium House» va «Alliance Traiding House» MChJlar rahbari K.X. jinoyat ishiga gumonlanuvchi tariqasida jalb qilinib, unga nisbatan qamoqqa olish tarzida ehtiyot chorasi qo‘llangan.

Hozirda tergov harakatlari olib borilmoqda.