Eron yadro kelishuvi bo‘yicha YeI va AQSh bilan muzokaralardan bosh tortdi - WSJ

Eron hukumati yadro kelishuvi bo‘yicha AQSh va Yevropa ittifoqi bilan muzokaralar olib borishdan bosh tortdi. Bu haqda ikki yuqori mansabdor diplomatga tayanib Wall Street Journal nashri xabar berdi. 

Ta'kidlanishicha, muzokaralar yaqin haftalarda o‘tkazilmaydi. Rasmiy shaxslar hozircha bu masala bo‘yicha izoh berishmagan.

Bundan avval AQSh xalqaro vositachilar “oltiligi” ishtiroki va Yevropa ittifoqi vositachiligida Eron bilan yadro kelishuvi bo‘yicha muzokaralar o‘tkazishga tayyorligini bildirgandi. Eron bunga javoban o‘ziga qarshi kiritilgan sanksiyalarning bekor qilinishini talab qilgan.

Avvalroq Britaniya, Germaniya va Fransiya Eronni yadro kelishuvini buzishda ayblagandi. 

2015 yilda Rossiya, AQSh, Fransiya, Britaniya, Xitoy va Germaniya Tehronga qarshi kiritilgan sanksiyalar bekor qilinishi evaziga Eron yadro dasturining muzlatilishi bo‘yicha Eron bilan yadro kelishuvini imzolagandi. 2018 yil mayida AQSh prezidenti Donald Tramp Vashingtonning ushbu kelishuvdan bir tomonlama ravishda chiqishini e'lon qilgan.