«Hokim o‘rinbosarlari «Obod qishloq» va «Obod mahalla» dasturiga ajratilgan mablag‘ sarfi bo‘yicha mahalliy deputatlarga hisobot beradi» - Moliya vazirligi 

Kun.uz muxbiri xabariga ko‘ra, Moliya vazirligi departament direktori birinchi o‘rinbosari Bobir Xudoyberganov «Obod qishloq» va «Obod mahalla» dasturi bajarilishida shaffoflikni ta'minlash maqsadida hokim o‘rinbosarlari mahalliy deputatlarga har chorakda va zarur hollarda oy yakunida hisobot berib borishini ma'lum qildi.

«Ajratilayotgan mablag‘ yirik. Shu bois uning sarflanishida shaffoflikni ta'minlash ham asosiy masala hisoblanadi. 

Bu yilgi «Obod qishloq» va «Obod mahalla» dasturlarining oldingilaridan farqi — qaysi qishloq yoki mahallaning obodonlashtirish ishlari olib borilishi bevosita mahalliy kengashlar tomonidan belgilanadi.  

Chunki deputatlar hududlardagi muammolarni yaxshi biladi. Qaysi muammoni qanday va qancha mablag‘ evaziga hal etishni ham ular yaxshi bilishadi. Shaffoflik shu tizim orqali shakllanadi. 

Ushbu mablag‘lar sarflanishi bo‘yicha jamoatchilik nazorati o‘rnatiladi. Hokim o‘rinbosarlari har oy va chorak yakuni bo‘yicha ajratilgan mablag‘lar sarflanishi haqida hisobot berib boradi», dedi Bobir Xudoyberganov.