Birgina Jondor tumani tibbiyot birlashmasi boshlig‘i 1 milliard so‘mdan ortiq noqonuniy xarajatlarga yo‘l qo‘ygan - prezident

«Sohada haligacha korrupsiya illatiga barham berilmayapti. Birgina Onkologiya markazining Toshkent shahar filialida 828 million so‘m, Toshkent pediatriya instituti klinikasi mansabdorlari 423 million so‘m mablag‘larni o‘zlashtirib yuborgan.

Shuningdek, Jondor tumani tibbiyot birlashmasi boshlig‘i 1 milliard so‘mdan ortiq noqonuniy sarf-xarajatlarga yo‘l qo‘ygan.

Bunday misollarni har bir viloyat, tuman va shahar kesimida ko‘plab keltirish mumkin.

Shuning uchun, sohada qonun ustuvor va jazo muqarrarligini ta'minlash bo‘yicha bosh prokurorning birinchi o‘rinbosari Valiyev ta'sirchan nazorat tizimini o‘rnatishga mas'ul bo‘ladi.

[Hisob palatasi raisining 1-o‘rinbosari] Turobov, [Monopoliyaga qarshi kurashish qo‘mitasi raisi] Shorahmetov ikki oy muddatda ajratilayotgan mablag‘lar joylarga manzilli yetib borishi, dori-darmon, tibbiyot uskunalari ochiq-oshkora sotib olinishi, taqsimlanishi, pullik xizmatlardan tushumlar maqsadli ishlatilishini ta'minlaydigan mexanizmlarni joriy qilishi zarur.

Valiyevga topshiriq, albatta, tibbiyot tizimida korrupsiyani hozircha butunlay yo‘q qilib bo‘lmaydi. Lekin kamaytirish, profilaktikasi bo‘yicha takliflar bering.

Chunki tibbiyotga ajratilgan pullar bu xalqning puli», – dedi prezident.