Tomorqa xo‘jaliklarini hisobga olish reyestrida talab etiladigan ma'lumotlar ro‘yxati tasdiqlandi

Tomorqa xo‘jaliklari hisobi shaxsiy tomorqa yer uchastkalaridan tomorqa xo‘jaligini yuritish uchun foydalanadigan shaxslar tomonidan ixtiyoriy ravishda taqdim etiladigan ma'lumotlar asosida, fuqarolarning o‘zini o‘zi boshqarish organlari tomonidan tomorqa xo‘jaliklarini hisobga olish reyestrini shakllantirish orqali yuritiladi.

Tomorqa xo‘jaliklarini hisobga olish reyestrida quyidagi axborot aks ettiriladi:

• shaxsiy tomorqa yer uchastkasi egasining, shuningdek, u bilan birga yashovchi yoki tomorqa xo‘jaligini yuritishni birgalikda amalga oshiruvchi boshqa shaxslarning familiyasi, ismi, otasi ismi, tug‘ilgan sanasi;
• shaxsiy tomorqa yer uchastkasining don ekinlari, mevali va manzarali daraxtlar ekilgan, shuningdek, boshqa qishloq xo‘jaligi mahsulotlari yetishtiriladigan (qayta ishlanadigan) maydoni;
• qishloq xo‘jaligi hayvonlari, asalarilar, parrandalar va ipak qurti qutilari soni;
• qishloq xo‘jaligi texnikasi, uskunalari, transport vositalari soni to‘g‘risidagi axborot.

Tomorqa xo‘jaliklarini hisobga olish reyestrida aks ettirilgan ma'lumotlardan qonunchilikda belgilangan tartibda tomorqa xo‘jaliklarini rivojlantirishga doir asosiy ko‘rsatkichlarni shakllantirish va amalga oshirish, ularni davlat tomonidan qo‘llab-quvvatlash maqsadida foydalaniladi.