30 ming dollar evaziga prokuraturaga ishga joylashni va'da qilgan shaxs qo‘lga olindi

Bosh prokuratura matbuot xizmatining xabar berishicha, prokuratura organlariga ishga olib kirishni va'da qilgan shaxslar qo‘lga olindi.

Ma'lumotga ko‘ra, «Nosir» ismli shaxs mansabdor yaqinlari orqali fuqaro A.E.ni prokuratura organlariga ishga joylashtirishini aytib, evaziga 30 ming AQSh dollari talab qilgan.

U ushbu pullar hisobidan 5 ming dollarini oldindan berish kerakligini aytgan.

A.E.ning tanishi I.E. ushbu holat yuzasidan prokuratura organlariga ariza bilan murojaat qilgan.

4 aprel kuni murojaat yuzasidan o‘tkazilgan tezkor tadbirda, 2 nafar fuqaro Chilonzor tumanidagi «Denov» choyxonasida I.E.dan 5 ming dollarni olgan vaqtda ashyoviy dalillar bilan ushlangan.

Gumondor shaxslar protsessual tartibda ushlangan. Holat yuzasidan Bosh prokuratura huzuridagi Departamentning Qashqadaryo viloyati boshqarmasi tomonidan jinoyat ishi qo‘zg‘atildi.

Tergov harakatlari olib borilmoqda.

Avvalroq Milliy gvardiyaga ishga kiritib qo‘yish uchun 27 500 dollar, DXXga ishga kiritib qo‘yish uchun 5000 dollar, qamoqxonaga ishga joylashtirib qo‘yish evaziga 2000 dollar so‘ragan shaxslar ushlangan edi.