Mahkumlar qonun bilan taqiqlanmagan buyumlarni elektron do‘konlar orqali sotib olishi mumkin bo‘ladi

“Ichki ishlar organlarining jamoat xavfsizligini ta'minlash va jinoyatchilikka qarshi kurashish sohasidagi faoliyatini yanada takomillashtirish bo‘yicha qo‘shimcha tashkiliy chora-tadbirlar to‘g‘risida”gi prezident qarori qabul qilindi.

Foto: lakeridgenewsonline

Adliya vazirligi xabariga ko‘ra, 2021–2023 yillar davomida jazoni ijro etish tizimini raqamlashtirish orqali sohada inson omilini istisno etish va jazo o‘tashning tartibotini ta'minlash maqsad qilingan.

Bunda:

jazoni ijro etish muassasalari va tergov hibsxonalarida qat'iy intizom va qonuniylikni ta'minlash, korrupsiyaviy holatlarning oldini olish, shuningdek, mahkumlarni saqlash holati ustidan nazorat olib borish jarayonlari to‘liq avtomatlashtiriladi;
jazoni ijro etish muassasalarida mahkumlar, shu jumladan ularning qarindoshlari tomonidan qonun bilan taqiqlanmagan buyumlarni erkin bozor mexanizmlariga asoslangan elektron do‘konlar orqali sotib olish imkoniyati yaratiladi;
har bir mahkumning xulq-atvori va shaxsi haqidagi ma'lumotlar elektron bazasi yuritiladi va uning asosida mahkumlarni taqsimlash jarayoni to‘liq raqamlashtiriladi.

Bundan oldin, qamoqxonalar xodimlari ham bodikamera bilan ta'minlanishi xabar berilgandi.