Po‘lat Bobojonov Qoraqalpog‘istonda 7 nafar xodimni ishdan oldi. 9 ta hududdagi faoliyatga jiddiy e'tiroz bildirib, 14 inspektorni rotatsiya qildi

Qoraqalpog‘iston Respublikasi Ichki ishlar vazirligida o‘rganishlar yakuniga bag‘ishlangan kengaytirilgan videoselektor yig‘ilishi bo‘lib o‘tdi. Unda Ichki ishlar vaziri Po‘lat Bobojonov, Vazirlar Kengashi raisi Qahramon Sariyev, respublika va shahar-tuman sektor rahbarlari ishtirok etishdi.

Yig‘ilishda 2020 yil davomida va joriy yilning o‘tgan davrida, Qoraqalpog‘istonda jinoyatchilikka qarshi kurash va huquqbuzarliklarni barvaqt aniqlash borasidagi ishlar muhokama qilingan.

Ichki ishlar vaziri «Temir daftar», «Ayollar» va «Yoshlar» daftarlariga kiritilgan fuqarolarni har tomonlama qo‘llab-quvvatlash borasida yetarli chora-tadbirlar belgilanmaganligi uchun Nukus shahri, Qanliko‘l, Kegeyli, Chimboy, Qo‘ng‘irot, Taxiatosh, Beruniy, Qorao‘zak va Bo‘zatov tumanlari huquq-tartibot idoralarining faoliyatiga jiddiy e'tiroz bildirgan.

Shuningdek, o‘z xizmat hududida jamoat xavfsizligini ta'minlashda yo‘l qo‘ygan jiddiy kamchiliklar uchun 7 nafar ichki ishlar organlari xodimlari egallab turgan lavozimidan ozod etilgan. 5 nafar xodim esa intizomiy jazoga tortilgan. Shu bilan birga, doimiy yashash joyidan olisda xizmat qilayotgan 14 nafar profilaktika inspektorlari rotatsiya qilingan.