Yaponiyaliklarning aksariyati Tokiodagi Yozgi Olimpiada o‘yinlari o‘tkazilishiga qarshi ekani ma'lum bo‘ldi

Yaponiya aholisining ko‘pchiligi Tokiodagi Olimpiada o‘yinlari bekor qilinishi yoki o‘tkazish muddati ko‘chirilishi tarafdori. Bu Kyodo agentligi o‘tkazgan so‘rovda ma'lum bo‘ldi.

Respondentlarning 39,2 foizi o‘yinlar butunlay bekor qilinishini yoqlab ovoz bergan bo‘lsa, 32,8 foizi Olimpiada muddati ko‘chirilishi tarafdori ekanini bildirgan. O‘yinlar o‘z vaqtida o‘tkazilishini qo‘llab-quvvatlab so‘rovda qatnashganlarning 24,5 foizi ovoz bergan.

Yanvarda o‘tkazilgan so‘rovda ishtirokchilarning 80 foizi 2021 yildagi Olimpiada o‘yinlari Tokioda o‘tkazilishini salbiy baholagandi. Shu bilan birga, so‘rovda qatnashganlarning 35,3 foizi mamlakatda har qanday xalqaro sport musobaqalari o‘tkazilishiga qarshi ekanini ma'lum qilgan.

Tokio Olimpiadasi 2020 yil 24 iyul — 9 avgust kunlari o‘tkazilishi lozim edi, ammo pandemiya sababli musobaqa bir yil keyinga qoldirilgandi.

Avvalroq Tokiodagi Olimpiada o‘yinlariga xorijlik muxlislar kiritilmasligi ma'lum bo‘lgandi.